Elgoibarko Udalak eta Badihardugu elkarteak, Eibar, Eskoriatza eta Aretxabaletako Udalekin lankidetzan, beste urrats bat egin dute ‘Ahotsak gelan‘ proiektuaren barruan, ‘Jira bueltan’ liburu-DVDaren edizioarekin.

Planarekin bat egin duten lau herrietako bederatzi ikastetxe publikoetako hirurehun haurrek hartu dute parte lana prestatzen. Guztira, 51 abesti eta jolas bildu zituzten, eta, horretarako, 60 pertsona nagusiren testigantza izan zuten. Lekuko gisa aritu ziren, haurrek kantatzen zituzten abestiak eta haurtzaroan ondo pasatzeko izandako jolasak gogoratuz.

Hainbat ikastetxe publikok hartu dute parte ‘Ahotsak gelan’ proiektuan: Aretxabaleta, Eskoriatza, Eibar, Elgoibar, Pasaia, Ordizia, Tolosa, Arrasate… bai Haur Hezkuntzan bai Lehen Hezkuntzan. Abestiak eta jolasak lantzeaz gain, gaikako bideoak ere prestatu dituzte.