Urtebete igaro da Hezkuntza Legea onartu zenetik, eta bi urte eta erdi lege hori oinarritu zuen hezkuntza akordioa onartu zenetik. Ordutik, Hezkuntza Sailaren jarduna eskasa izan da, eta oso urrun daude haiek hartutako konpromiso zehatzetatik.

Euskal Autonomia Erkidegoko Hezkuntzari buruzko 17/2023 Legeak eskola publikoaren protagonismoa aipatzen badu ere, argi dago Hezkuntza Sailarentzat eskola publikoa ez dela lehentasuna.

Ituntze unibertsala blindatu da, eskola-postu pribatu berriak sortu dira plaza libreak egonik eskola publikoan eta sare pribatu itunduaren finantzaketa handitu da.

Ikastetxe pribatu-itunduetan kuotak kobratzen jarraitzen da, ez da ordainketa horiek kontrolatzeko administrazio-unitaterik sortu eta ez da eskola-zerbitzuak onartzeko prozedurarik ezarri. Onartutako kuotak eta kontzeptuak ere ez dira argitaratu Hezkuntza Sailaren webgunean, Legeak berak jasotzen duen bezala.

Segregazioaren aurkako neurriak ez dira funtzionatzen ari. Ez dago aniztasunaren eskolatze orekaturik, eta Hezkuntza Sailak bigarren urte honetan segregazioaren aurkako neurriak pixkanaka ezartzea blokeatu du.

Ikasturte honetan, Sailak hainbat harreman izan ditu Eskola Publikoaren Plan Estrategikoa egiteko. Proposatutako gaien edukiak ez ditu barne hartzen eskola publikoaren etorkizunerako ezinbestekoak diren alderdiak, hala nola azpiegiturak berritzea eta hobetzea, eskola publikoaren perimetroa handitzea, plaza publikoak gehitzea edo eskola publiko batean plaza bat nahi duen familia orok bertara sartzeko aukera izatea.

Era berean, ez zaio heldu Eskola Mapari, demografiaren beherakadak ikastetxe publikoen etorkizunean izango duen eraginari, Haurreskolak hezkuntza-sistema publikoan erabat integratzeari, itunpeko ikastetxeak publiko egiteari, edo jantokiak hezkuntza-proiektuaren barruan integratzeari. Azken arau-aldaketak bidea ixten dio eskola-jantokiaren eredu alternatibo bati.

Horregatik guztiagatik, hezkuntza legea aldatu eta urtebetera, EHIGEk balorazio negatiboa egin du Hezkuntza Sailaren jarduketei buruz, ez baita aurrera egin Euskal Eskola Publikoaren etorkizunerako estrategikoak diren gaietan.