Joan den urtarrilaren 18an, Basauriko ikastetxe publikoetako IGEek eta BIGEk elikadura hezkuntzari eta familia elikadurari buruzko tailerra antolatu genuen Basauriko Elikadura Eskola barnean.

Tailerra Bizkotxalde eskolan egin zen eta Basauriko ikastetxe publiko guztietako familiek parte hartu zuten. 55 pertsona inguruk modu aktiboan parte hartu zuten tailerrean, eta ikastetxeetako zuzendaritza taldeek eta Basauriko Udaleko ordezkariek ere parte hartu zuten. Tailerra nutrizioan aditua eta chef osasuntsua den Amalia Holguinek eman zuen.

IGEek eta BIGEk uste dugu oso garrantzitsua dela familiengan eta ikastetxeetan kontzientzia sortzea, gizartea eraldatzeko aparteko eragile dinamizatzailea baitira.

Familien kezka nagusia zer den benetan elikadura osasungarria eta iraunkorra ulertzea eta prestatzea da, eguneroko bizitzan praktikan jarri ahal izateko, eta, jakina, behar adina informatuta eta egotea eskola-jantokian ere elikadura osasuntsua eta iraunkorra exijitzeko.

Hauek izan dira landutako gaiak:

• Plater osasungarria. Zer elikagai izan behar dituen plater osasuntsu batek eta zer proportziotan.
• Prozesatuak. Zer diren eta nola eragiten duten gure osasunean. Haurrek kontsumitutako prozesatu arruntenen adibideak erakutsi ziren, baita horiek ordezkatzeko ideiak ere.
• Gosarien, askarien eta afarien ideiak, eskolako elikadura osatzeko eta orekatzeko.
• Haurrekin presta daitezkeen errezeta erraz eta osasungarriak.

Familien aldetik tailerraren ebaluazioa bikaina izan da, parte-hartzaileen % 96k tailerra oso modu egokian ebaluatu zuten eta bertaratutakoen ia % 100ek bigarren tailer bat egiteko konpromisoa hartu zuten.

BIGEtik eskerrak eman nahi dizkiogu Bizkotxalde ikastetxeko zuzendaritzari bere zentroko ateak irekitzeagatik eta tailerra egitea errazteagatik. Eskerrik asko!