Donostiako Intxaurrondo Hegoa ikastetxe publikoak ikasturte honetan Haur eta Lehen Hezkuntzako 115 ikasle inguru ditu. Bere hezkuntza-proiektuaren ezaugarri nagusia ikastetxe eleaniztuna izatea da, ikasketak euskaraz, ingelesez eta gaztelaniaz ematen dituena. Berrikuntza gisa, euskararen eta ingelesaren murgiltze goiztiarreko eredu berritzaile hori 2 eta 3 urteko geletan ere ezarriko da aurten. Horrez gain, proiektuetan oinarritutako metodologia baten aldeko apustua egin du, haurren ezagutzetatik eta interesetatik abiatuta, eta haurrek beren ikaskuntza-prozesuaren parte aktiboa izan dezaten.

Proiektu eta jarduera horietako asko garatzeko, adin desberdinetako ikasleek elkarrekin lan egiten dute. Ikastetxea dagoen kalearen omenez (Baratzategi kalea), ikasleek ikastetxearen inguruan kokatutako eskola-baratza ere lantzen dute.